Nga Elton Qyno
Këta janë dy personat që policia dhe prokuroria e Durrësit po verifikon, lidhur me arratisjen e bujshme të Altin Ndocit, nga spitali Infektiv.

Edmond Gjyzeli dhe Izmir Kusi, janë dy njerëzit që rezultojnë se kohët e fundit kanë zhvilluar takime me Altin Ndocin në ambientet e paraburgimit të Durrësit. Aktualisht ndaj Edmond Gjyzelit dhe Izmir Kusit, janë duke u kryer verifikime, ndërsa njëri prej tyre është shoqëruar në policinë e Durrësit dhe ka dhënë shpjegime.

Ndërkohë banesat e tyre janë kontrolluar nga policia me shpresën e gjetjes së Altin Ndocit. Disa banesa të familjarëve të tyre janë kontrolluar, por pa rezultat. Anëtarë të grupit hetimor besojnë se grupi mund të ketë marrë disa shtëpi me qera, me qëllim zhvendosjen e Altin Ndocit nga një shtëpi në tjetrën, duke shmangur lokalizimin e tij nga policia.

Altin Ndoci, u arratis tre ditë më parë nga spitali i Durrësit ku ishte dërguar për të kryer një ekzaminim shëndetësor. Shoqërimi u bë me ambulancën e burgut jashtë standardeve të sigurisë, duart e palidhura me pranga dhe mjaft i lirë ashtu si dhe grupi shoqërues i Policisë së Burgjeve./Syri.net