Një veprim i konsideruar absurd dhe tronditës ka ardhur nga institucionet ligjzbatuese në Korçë, ku pas lirimit nga burgu të autorëve të dyshuar të vrasjes së Martin Çeços, tani procedohet penalisht babai i tij, 70-vjeçari Nevzat Çeco.

Policia ka nisur procedim penal ndaj të moshuarit për veprën penale “kanosja serioze për hakmarrje ose për gjakmarrje”, pas deklaratave të tij publike në media, ku shprehte revoltën dhe dëshpërimin e thellë pas vendimit të Gjykatës së Apelit Tiranë për t’u ndryshuar masën e sigurisë autorëve të dyshuar nga “arrest në burg” në “arrest në shtëpi”.

Deklaratat e Çecos erdhën si reagim emocional ndaj vendimit gjyqësor, të cilin ai e cilësoi si padrejtësi të rëndë dhe barazim të arrest-shtëpisë me lirim. Në gjendje të rënduar psikologjike, babai i viktimës artikuloi kërcënime verbale ndaj personave që akuzohen për vrasjen e djalit të tij, çka u përdor më pas si bazë për procedimin penal ndaj tij.

Ngjarja ka shkaktuar reagime të forta në opinionin publik, pasi për shumëkënd situata përfaqëson një paradoks të rëndë institucional: autorët e dyshuar të një vrasjeje përfitojnë lehtësim mase, ndërsa babai i viktimës, i rrënuar nga humbja dhe zhgënjimi ndaj drejtësisë, përballet me ndjekje penale për fjalë të thëna në kushte tronditjeje ekstreme.

Rasti ngre pikëpyetje serioze mbi ndjeshmërinë e sistemit të drejtësisë, trajtimin e familjarëve të viktimave dhe standardin e reagimit shtetëror në situata të tilla, ku dhimbja dhe revolta njerëzore përplasen drejtpërdrejt me formalizmin penal.