FOTO ILUSTRUESE
Një ngjarje e pabesueshme ka tronditur dhe njëkohësisht mahnitur opinionin publik në Indi: një fëmijë 2-vjeçar arriti të shpëtojë jetën e tij duke vrarë me kafshim një kobër helmuese, që u përpoq ta sulmonte brenda shtëpisë së tij në një fshat të zonës West Champaran, shteti i Bihar-it.

Sipas mediave indiane, episodi ndodhi javën e kaluar, teksa familjarët u përballën me skenën tronditëse: vogëlushi mbante në dorë një kobër, të cilën në një reagim instinktiv për t’u mbrojtur e kishte kafshuar në kokë, duke e vrarë në vend.

“Kur e pamë që po mbante gjarprin, vrapuam drejt tij, por ai tashmë e kishte kafshuar. Gjarpri ngordhi në vend”, ka rrëfyer për mediat gjyshja e djalit.

Menjëherë pas incidentit, fëmija humbi ndjenjat dhe u dërgua me urgjencë në një qendër shëndetësore, më pas u transferua në një spital të specializuar. Fatmirësisht, ai arriti të shpëtojë pa pasoja fatale.

Mjekët u shprehën të befasuar nga rasti: ndërsa kafshimi i gjarprit zakonisht përhap helm përmes gjakut dhe shkakton neurotoksicitet, në këtë rast helmimi ndodhi përmes gojës, duke hyrë në traktin tretës dhe jo në qarkullimin e gjakut – çka e bëri më të lehtë trajtimin.

“Fëmija erdhi i vetëdijshëm, por me gojë dhe fytyrë të fryrë për shkak të helmimit lokal. Kontrolluam disa herë për të siguruar që nuk ishte pickuar. Prindërit na sqaruan se ai e kishte kafshuar vetë kobrën”, – deklaroi mjeku për The Telegraph.

Pas 48 orësh në vëzhgim intensiv, vogëlushi u lëshua në shtëpi pa asnjë simptomë të rëndë. Ngjarja po cilësohet si mrekulli nga komuniteti vendas, ndërsa në rrjetet sociale ai tashmë po quhet:
“Djali që mposhti kobrën me dhëmbë.”