Arratisja e 38-vjeçarit Altin Ndoci, i dyshuar nga SPAK si pjesë e organizatës kriminale të Çopjave dhe përfshirë në masakrën me tre viktima në Bradashesh, rezulton të jetë ndërtuar mbi një skenar banal, por alarmues, ku shkeljet e rënda procedurale kanë ndodhur në çdo hallkë, nga burgu i Durrësit deri në ambientet e spitalit Rajonal.

Sipas dosjes së Prokurorisë, të siguruar nga mediat, Ndoci u transportua nga burgu drejt spitalit me një furgon ambulancë, së bashku me një tjetër të burgosur, nën shoqërinë e pesë efektivëve të policisë. Gjatë rrugës ai u ankua për dhimbje veshkash, çka u përdor si justifikim për t’i hequr prangat, në kundërshtim flagrant me rregulloren për shoqërimin e personave me rrezikshmëri të lartë.

Në spital, Ndoci u dërgua në një dhomë të izoluar në katin e tretë të Infektivit dhe qëndroi aty për rreth tre orë pa u vizituar nga asnjë mjek. Gjatë kësaj kohe, ai kërkoi katër herë të shkonte në tualet, duke testuar reagimin e policëve. Kërkesa e pestë rezultoi vendimtare për arratisjen.

Në momentin që dera e dhomës u hap, dhe Ndoci ishte i pa prangosur, ai goditi me grusht një nga policët shoqërues, duke e rrëzuar mbi kolegun tjetër. Të dy përfunduan në tokë, ndërsa i paraburgosuri u largua me vrap nga kati i tretë. Njëri prej policëve tentoi ndjekjen, por u rrëzua sërish në shkallët e spitalit. Në oborr u qëllua një e shtënë paralajmëruese, jo në ajër siç parashikon ligji, por në tokë, ndërsa Ndoci u largua me një automjet që dyshohet se e priste jashtë ambienteve të spitalit.

Në dosje thuhet se policët tentuan të njoftonin sallën operative në numrin 129, por nuk morën përgjigje. Më pas u njoftua administrata e burgut, ndërsa arratisja tashmë ishte kryer.

Hetimet kanë zbuluar një zinxhir vendimesh të dyshimta që nis që nga kryeinfermieri i burgut, Aulon Çuku, i cili kërkoi rekomandime mjekësore për disa të burgosur pa u kryer vizita reale. Mjekja e burgut firmosi dokumentacionin për Altin Ndocin pa e ekzaminuar, ndërsa drejtori i burgut, Indrit Cërloj, e miratoi shoqërimin pa verifikuar procedurat dhe pa marrë masa shtesë sigurie, pavarësisht se Ndoci ishte i akuzuar për vepra të rënda penale.

Paradoksalisht, komisioni i vlerësimit në burg kishte konkluduar se Ndoci “nuk paraqiste rrezik arratisjeje”, një vlerësim që sot bie ndesh me realitetin dhe faktet e dala nga dosja hetimore.

Për këtë çështje, Gjykata ka lënë në burg disa nga efektivët e përfshirë në shoqërim, ndërsa kryeinfermieri është vendosur në arrest shtëpie. Hetimet vijojnë për të zbardhur nëse arratisja ishte thjesht pasojë e paaftësisë apo një skenar i mirëorganizuar me bashkëpunim nga brenda sistemit.