Altin Ndoci, i paraburgosur në IEVP Durrës, rezulton se nga viti 2020 deri në 2024 është shoqëruar vetëm katër herë në spital për probleme shëndetësore. Ndërsa në periudhën 8 tetor 2025 – 13 janar 2026, ai është nxjerrë jashtë burgut për vizita mjekësore plot pesë herë, një frekuencë e pazakontë që ka ngritur dyshime serioze për organin e akuzës. Këto dalje janë realizuar nën drejtimin e disa drejtorëve të institucionit, më 08.10.2025 nga Ervis Dedej, më 24.10.2025 nga Edmond Llabani (i komanduar) dhe tri herë të tjera, më 26.11.2025, 18.12.2025 dhe 13.01.2026, kur drejtimi i paraburgimit i ishte besuar Indrit Cerlojit, i cili aktualisht ndodhet në arrest me burg, i dyshuar për shpërdorim detyre lidhur me arratisjen e Ndocit.
Prokuroria dyshon se këto vizita mjekësore kanë qenë fiktive dhe të planifikuara pa pasur nevojë reale për trajtim jashtë institucionit. Sipas dosjes hetimore, asnjë nga daljet e Ndocit gjatë periudhës tetor 2025–janar 2026 nuk është pasqyruar në komunikatat e aktivitetit ditor të Drejtorisë së Përgjithshme të Burgjeve dhe nuk është njoftuar Shërbimi i Kontrollit të Brendshëm në Sistemin e Burgjeve (SHKBB), në shkelje të hapur të procedurave ligjore. Prokuroria thekson se rritja e menjëhershme e daljeve, krahasuar me historikun e mëparshëm, përbën “dyshim të arsyeshëm” për abuzim me procedurat e shoqërimit për në spital.
Sipas hetimeve, Ndoci është dërguar në spitalin e Durrësit pa u vizituar më parë nga mjekja e burgut, e cila dyshohet se ka firmosur rekomandimin vetëm mbi kërkesën e kryeinfermierit Altin Cuku. Ai është transportuar me ambulancën e burgut, së bashku me një tjetër të paraburgosur dhe i shoqëruar nga vetëm pesë punonjës sigurie, në kundërshtim me protokollet që parashikojnë minimum tre efektivë për çdo të burgosur. Pavarësisht se i dyshuar për vepra të rënda penale, përfshirë vrasjen, Ndoci ishte klasifikuar si person me rrezikshmëri të ulët, vlerësim që sipas Prokurorisë ka kontribuar drejtpërdrejt në krijimin e kushteve për arratisjen e tij, në një skemë që dyshohet se përfshin favore dhe ryshfete ndaj drejtuesve dhe personelit të burgut.
