Një situatë alarmante është regjistruar në shtetin Jharkhand të Indisë lindore, ku një elefant i egër ka shkaktuar vdekjen e të paktën 22 personave brenda vetëm 10 ditësh, ndërsa autoritetet ende nuk kanë arritur ta kapin ose neutralizojnë kafshën.

Sipas autoriteteve lokale, elefanti është shfaqur për herë të parë më 1 janar në zonën e Chaibasa dhe pyjet e Kolhan, pjesë e distriktit West Singhbhum, duke sulmuar fshatra dhe banorë, kryesisht gjatë natës. Viktimat përfshijnë burra, gra dhe fëmijë, si dhe një punonjës pyjor që ishte përfshirë në përpjekjet për menaxhimin e situatës.

Mes rasteve më tragjike është vrasja e një çifti bashkë me dy fëmijët e tyre, të cilët u shkelën për vdekje teksa flinin në fshatin Babaria. Në incidente të tjera, banorë janë sulmuar pranë banesave të tyre, në fusha bujqësore apo teksa ruanin prodhimet bujqësore gjatë natës, një praktikë e zakonshme në zonat rurale të Indisë.

Autoritetet kanë konfirmuar viktima edhe në zona të tjera përreth, përfshirë Hatgamharia, Bada Pasiya dhe Lampaisai. Banorëve u është kërkuar të qëndrojnë brenda banesave dhe të shmangin zonat pyjore, ndërsa e gjithë zona është vënë në gjendje alarmi maksimal.

Përpjekjet për kapjen e elefantit kanë dështuar disa herë. Sipas raportimeve, kafsha u detyrua përkohësisht të largohej drejt shtetit fqinj Odisha, por më pas u rikthye sërish në Chaibasa, pasi autoritetet lokale refuzuan ta mbanin për shkak të rrezikut. Edhe ekipet e specializuara nga rajone të tjera nuk kanë arritur ta ndalin, ndërsa një ekspert humbi jetën gjatë një përpjekjeje për ta menaxhuar situatën.

Zyrtarët e jetës së egër besojnë se elefanti është një mashkull i ri, i cili mund të ndodhet në fazën e çiftëzimit, një periudhë kur meshkujt përjetojnë rritje të lartë të agresivitetit për shkak të ndryshimeve hormonale. Sipas tyre, kjo gjendje mund të zgjasë deri në 15–20 ditë. Një tjetër hipotezë është se kafsha është shkëputur nga tufa dhe po përpiqet të rikthehet tek ajo.🎥/📷Më poshtë pamjet ekskIuzive⬇️

Një operacion i gjerë kërkimi, me mbi 100 punonjës pyjorë, është në zhvillim për gjurmimin, kapjen dhe rikthimin e sigurt të elefantit në natyrë. Autoritetet kanë paralajmëruar se prioritet absolut është parandalimi i viktimave të tjera, ndërsa familjet e personave që kanë humbur jetën do të përfitojnë kompensim financiar.

Zyrtarët lokalë e kanë cilësuar situatën si të paprecedentë, duke theksuar se është hera e parë që një numër kaq i lartë viktimash lidhet me një elefant të vetëm në këtë rajon. Ndërkohë, ekspertët rikujtojnë se konfliktet mes njerëzve dhe elefantëve janë shtuar vitet e fundit, si pasojë e shkatërrimit të habitateve natyrore dhe zgjerimit të aktivitetit njerëzor pranë korridoreve të kafshëve të egra.