Autoritetet shëndetësore në Indi janë vënë në alarm pas konfirmimit të tre rasteve me virusin Nipah në Bengal Perëndimor, pranë qytetit Kolkata. Të infektuarit janë një mjek, një infermiere dhe një punonjës tjetër shëndetësor, ndërsa një pacient është në gjendje kritike. Për të ndaluar përhapjen, rreth 20 persona janë futur në karantinë dhe mbi 180 janë testuar.

Nipah është virus që vjen nga kafshët, kryesisht lakuriqët e natës dhe derrat, por mund të përhapet edhe nga njeriu te njeriu. Simptomat fillojnë me ethe, dhimbje koke dhe muskujsh, të vjella dhe dhimbje fyti, por shpejt mund të kthehen në probleme serioze me frymëmarrjen dhe trurin. Në rastet më të rënda, pacientët mund të bien në koma brenda dy ditësh. Vdekshmëria varion nga 40 deri në 75 për qind dhe nuk ka vaksinë apo ilaç specifik.

OBSH e ka klasifikuar Nipah si patogjen prioritar dhe ka kërkuar hetim urgjent dhe zhvillim vaksine. Ekspertët thonë se shpërthimet lidhen me ndërhyrjen e njeriut në natyrë dhe ndryshimet mjedisore. India regjistron raste pothuajse çdo vit, veçanërisht në Kerala, ndërsa virusi u zbulua për herë të parë në Malajzi dhe Singapor në 1999, duke vrarë dhjetëra njerëz.