Një situatë shqetësuese është raportuar në Fushë-Krujë, ku një qen ndodhet i bllokuar prej disa ditësh në lumin Zezë, pa asnjë ndërhyrje nga institucionet përkatëse.

Sipas banorëve të zonës, qeni ka mbetur i izoluar në shtratin e lumit dhe nuk arrin të dalë, ndërsa gjendja e tij duket gjithnjë e më e rënduar për shkak të lodhjes, urisë dhe kushteve të vështira.

Qytetarët shprehen të indinjuar për mungesën e reagimit, pavarësisht se rasti është konstatuar prej disa ditësh dhe rreziku për jetën e kafshës është i lartë. Ata bëjnë thirrje urgjente për ndërhyrje nga autoritetet lokale, shërbimet zjarrfikëse dhe strukturat për mbrojtjen e kafshëve.

Ngjarje të tilla ngrenë pikëpyetje serioze mbi përgjegjësinë institucionale dhe ndjeshmërinë ndaj rasteve emergjente, edhe kur bëhet fjalë për jetë kafshësh.

JOQ Albania i bën thirrje institucioneve, organizatave për mbrojtjen e kafshëve dhe vullnetarëve që të reagojnë sa më shpejt, duke larguar qenushin nga lumi dhe duke siguruar që ai të marrë kujdesin e nevojshëm.