Duke nisur nga ora 14:00 e së martës, 3 shkurt, mjetet e vogla lundruese dhe peshkarexhat ndalohen të dalin në det në Vlorë. Vendimi është marrë nga Kapiteneria e Portit të Vlorës për shkak të përkeqësimit të ndjeshëm të kushteve atmosferike që pritet të prekin gjirin e Vlorës dhe detin e hapur.

Sipas parashikimeve meteorologjike, në zonën detare do të fryjnë erëra të forta nga jugu dhe juglindja, me intensitet deri në 8–9 ballë dhe shpejtësi që mund të arrijë deri në 45 metra për sekondë. Si pasojë, dallgët pritet të jenë nga 3.5 deri në 6.5 metra, duke e bërë lundrimin jashtëzakonisht të rrezikshëm, veçanërisht për mjetet e vogla dhe ato të peshkimit.

Për këto arsye, ndalimi i lundrimit për varkat dhe peshkarexhat do të jetë në fuqi deri në orën 06:00 të mëngjesit të datës 5 shkurt. Autoritetet u bëjnë thirrje peshkatarëve dhe pronarëve të mjeteve lundruese që të sigurojnë varkat në port dhe të shmangin çdo dalje të panevojshme në det, sidomos gjatë orareve kur moti pritet të jetë më i ashpër.

Ndërkohë, anijet e mëdha të transportit ndërkombëtar do të vijojnë lëvizjen normalisht, ndërsa përmirësimi i kushteve të motit për mjetet e vogla pritet pas mëngjesit të së enjtes.