Detaje të reja dhe tronditëse kanë dalë në dritë nga tragjedia e rëndë e ndodhur në Itali, ku katër anëtarë të familjes shqiptare Kola humbën jetën si pasojë e helmimit nga gazi në banesën e tyre.
Momente dramatike nga vendngjarja ka rrëfyer për mediat italiane Ernest Çela, fqinj dhe bashkëatdhetar i familjes, i cili ishte ndër të parët që hyri në banesë së bashku me karabinierët dhe vëllain e kryefamiljarit. Sipas tij, ngjarja ka ndodhur rreth orës 21:30, kur në banesë mbërriti patrulla e karabinierëve, e shoqëruar nga xhaxhai i njërit prej viktimave.
“Mbrëmjen rreth orës 21:30 erdhi patrulla e karabinierëve bashkë me xhaxhain e djalit që ka ndërruar jetë. Menjëherë hymë në banesë dhe u ngjitëm në katin e dytë, ku pashë katër trupat të shtrirë pa ndjenja në tokë. Në atë moment shkova menjëherë të kontrolloja nëse kishin akoma puls dhe deri në atë moment kishin ende rrahje zemre”, tregon Ernest Çela.
Ai shpjegon se situata u përkeqësua brenda pak minutash, pasi edhe vëllai i viktimës humbi ndjenjat, ndërsa vetë ai filloi të ndiente marramendje. Sipas dëshmisë së tij, u kuptua menjëherë se në ambient kishte prani gazi dhe të gjithë u detyruan të largoheshin nga banesa për të shmangur rrezikun.
“Pastaj, në një moment, xhaxhai i djalit – ai që tani është i shtruar në spitalin e Cisanellos në gjendje të rëndë – humbi ndjenjat. Më pas edhe mua filluan të merreshin mendtë. Më pas bashkë me babanë tim dhe dy karabinierët kuptuam se në ajër kishte diçka, një gaz ose diçka e ngjashme.Kështu që dolëm të gjithë menjëherë jashtë nga banesa. Pasi dolëm, e kuptuam që në ambient kishte monoksid karboni. Zjarrfikësit erdhën pas pak kohe, nuk di të them nëse pati vonesë apo jo. Në vendngjarje ishte edhe një ambulancë. Pasi dolëm jashtë, na dhanë ndihmën e parë”, thotë i riu.
Ernest Çela sqaron gjithashtu se ekipet e ndihmës së shpejtë nuk u lejuan të ngjiteshin në banesë për shkak të rrezikut të lartë nga gazi. Ai thekson se në momentin kur kishte hyrë në apartament, viktimat ende shfaqnin shenja jete.
“Kur hapën dritaren, doli edhe një tym i bardhë. Por deri në momentin që unë isha lart, ata kishin puls”, përfundon ai.
