Në redaksinë e JOQ Albania ka mbërritur historia e veçantë e një vogëlushi që po fiton zemrat e ndjekësve në rrjetet sociale. Theo Haska, ende në një moshë shumë të vogël, ka treguar se pasioni i tij për topin ka nisur që herët. Sipas babait, fjala e tij e tretë në moshën vetëm 7-muajshe ka qenë “gol”, një detaj që sot duket si paralajmërim i dashurisë së madhe që ai ka për futbollin.

Duke parë talentin dhe entuziazmin e tij, prindërit vendosën t’i hapnin një llogari në TikTok, ku ndajnë momentet më të bukura të Theos me topin. Një nga videot u bë virale, duke tërhequr vëmendjen e klubit legjendar italian AC Milan, i cili reagoi me koment. Pas kësaj, ëndrra u bë realitet për vogëlushin, pasi ai pati një takim emocionues me skuadrën e Milanit, moment që u shoqërua me një tjetër reagim nga klubi në rrjetet sociale.

Historia e Theos është një dëshmi se pasioni dhe mbështetja e familjes mund të hapin dyer të mëdha, edhe në një moshë kaq të njomë. Familja shpreson që kjo histori të marrë më shumë vëmendje dhe mbështetje, ndërsa gjithçka mund të ndiqet në faqen e tij në TikTok, theo.haska, aty ku ëndrra e një vogëlushi për futbollin sapo ka nisur.