Një vajzë nga Tirana i është drejtuar redaksisë së JOQ Albania me një kërkesë të veçantë: që mikesha e saj e ngushtë, Anxhela Dervishi, të vlerësohet si një model frymëzimi për vajzat dhe gratë e reja.

Sipas saj, Anxhela është 30-vjeç, nënë e një djali 3-vjeçar dhe prej tre vitesh punon çdo ditë nga 12 deri në 14 orë, nga e hëna në të shtunë. Ajo ka arritur të ndërtojë jetën e saj nga zero, duke mbajtur mbi supe përgjegjësinë si nënë dhe profesioniste njëkohësisht.

“Ne Shqipëri promovohen shpesh modele pa vlera. Unë dua të propozoj një vajzë që ka sakrifikuar shumë, që punon fort dhe që ka ndihmuar shumë të rinj e të reja të punësohen. Ajo duhet të jetë modeli i femrës që ecën përpara në jetë,” – shkruan mikja e saj në mesazhin drejtuar redaksisë.

Në videon e dërguar, ajo shprehet:

“Sot dua të jap një mesazh për të gjitha vajzat, nënat, gratë që arrijnë gjithçka me punë dhe sakrificë. Një ndër to është mikesha ime e vjetër, Anxhela Dervishi, 30 vjeç, nënë e një djali 3-vjeçar, tashmë me profesion inxhiniere. E njoh prej 10 vitesh dhe jam shumë krenare për të. Ti meriton çdo gjë. Dua që Anxhi të jetë një model për të gjithë ato që duan t’ia dalin në jetë.”

Sipas dëshmisë së saj, Anxhela nuk është thjesht një nënë që punon dyfish për të ndërtuar të ardhmen e fëmijës së saj, por edhe një profesioniste që ka ndihmuar të rinj të tjerë të gjejnë punë dhe të ndërtojnë rrugën e tyre.

Në një kohë kur shpesh promovohen figura të lehta dhe suksese të shpejta, historia e një vajze që ka nisur nga zero dhe ka ecur përpara vetëm me punë dhe këmbëngulje, vjen si një mesazh i fortë për shoqërinë.

Sepse ndonjëherë, heronjtë e vërtetë nuk janë ata që bëjnë zhurmë, por ata që çdo ditë zgjedhin të mos dorëzohen.