Një aksident tragjik ka ndodhur në Milano, ku një tramvaj i linjës 9 doli nga shinat pasditen e së premtes, më 27 shkurt, në segmentin mes Piazza Repubblica dhe Porta Venezia. Si pasojë e aksidentit, dy persona humbën jetën dhe rreth 50 të tjerë mbetën të plagosur.

Sipas mediave italiane, tramvaji goditi një restorant dhe disa kalimtarë përgjatë viale Vittorio Veneto, përpara se të përfundonte përplasjen në një pallat në cep me via Lazzaretto. Viktimat janë identifikuar si Ferdinando Favia, 59 vjeç, tregtar nga Vigevano, dhe Abdou Karim Toure, 56 vjeç, me origjinë nga Senegali. Të dy ishin pasagjerë të mjetit dhe u hodhën jashtë gjatë daljes nga shinat; Toure ndërroi jetë në spital pasi u dërgua në gjendje kritike.

Hetuesit kanë sekuestruar pamjet e kamerave të sigurisë të vendosura në tramvaj dhe në zonën ku ndodhi aksidenti, për të verifikuar dëshminë e drejtuesit 61-vjeçar. Ai ka deklaruar se është ndjerë keq pak para incidentit dhe nuk ka arritur të aktivizojë shkëmbimin e shinave. Dyshohet se mjeti po lëvizte me “shpejtësi jashtëzakonisht të lartë”, duke devijuar majtas nga drejtimi natyral.

Prokurorja Elisa Calanducci, e cila po ndjek çështjen, është në pritje të akteve, përfshirë procesverbalin e shoferit, ndërsa pritet të kryhen autopsitë për dy viktimat dhe një ekspertizë kinematike për të zbardhur dinamikën e plotë të ngjarjes.

Në spital mbeten ende tre pacientë në gjendje më të rëndë, të klasifikuar si “kode të kuqe”. Dy burra ndodhen në reanimacion, por jashtë rrezikut për jetën, ndërsa një grua po mbahet në urgjencë për ekzaminime të mëtejshme. Pjesa tjetër e të plagosurve është lëshuar në shtëpi. Në observim mjekësor ndodhet edhe drejtuesi i tramvajit.