Sipas studimeve të ndryshme, njerëzit me një grup të caktuar gjaku mund të kenë prirje për jetëgjatësi më të madhe dhe rrezik më të ulët për sëmundje të caktuara kardiovaskulare.
Bëhet fjalë për grupin e gjakut 0 (zero), i cili në disa kërkime shkencore është lidhur me një rrezik më të reduktuar për sulm në zemër dhe goditje në tru. Këto sëmundje mbeten ndër shkaqet kryesore të vdekjeve në nivel global.
Sipas të dhënave të publikuara, një nga arsyet e mundshme është se gjaku i grupit 0 përmban më pak molekula që lidhen me mpiksjen e gjakut, duke ulur kështu rrezikun e formimit të trombeve që mund të shkaktojnë bllokime në enët e gjakut.
Megjithatë, ekspertët theksojnë se ky nuk është një faktor i vetëm përcaktues për jetëgjatësinë, pasi shëndeti ndikohet nga një kombinim faktorësh, përfshirë gjenetikën, stilin e jetesës, ushqyerjen dhe aktivitetin fizik.
Në një studim të Universitetit Stanford, të udhëhequr nga profesori Stuart Kim, janë analizuar gjenet e qindra personave mbi 100 vjeç dhe mijëra të tjerë në moshë të avancuar. Studiuesit kanë identifikuar disa gjene të lidhura me plakjen dhe jetëgjatësinë, përfshirë:
CDKN2B, i cili luan rol në ndarjen qelizore
ABO, i lidhur me grupin e gjakut
APOE, që ndikon në rrezikun për Alzheimer
SH2B3, i cili lidhet me jetëgjatësinë në disa organizma
Sipas studiuesve, disa variacione gjenetike shfaqen më shpesh te personat që arrijnë moshë shumë të madhe, ku grupi i gjakut 0 është vërejtur më shpesh në disa raste studimore.
Megjithatë, shkencëtarët theksojnë se këto janë lidhje statistikore dhe jo garanci, dhe mënyra e jetesës mbetet faktori më i rëndësishëm për shëndetin dhe jetëgjatësinë
