Pas një prej netëve më të komentuara dhe më emocionale për publikun shqiptar, moderatorja Arbana Osmani ka reaguar për herë të parë në rrjete sociale, duke ndarë me ndjekësit falënderimet dhe ndjesitë e saj pas rrëfimit të bujshëm në skenën e X Factor Albania.

Pasi preku zemrat e publikut me fjalët e saj të ndjera për largimin nga Big Brother VIP dhe arsyet personale që qëndronin pas këtij vendimi, Arbana shprehu mirënjohjen për të gjithë ata që e kanë përkrahur.

“Mbrëmë ka qenë një nga netët më emocionuese të jetës sime për shumë arsye… dhe nuk gjej fjalë për t’ju falenderuar për gjithë dashamirësinë dhe energjinë e mirë që kam marrë nga të gjithë ju.”

Moderatorja nuk harroi të falënderonte mikpritësit dhe bashkëpunëtorët:

“@alketavejsiu faleminderit për ftesën dhe për këtë kujtim kaq special që do ta ruaj gjithmonë, je e veçantë.”
@veragrabocka je një forcë e natyrës dhe uroj që energjia jote të mos shterojë kurrë.”

Arbana gjithashtu shprehu vlerësimin e saj për televizionin që e mirëpriti:

“Faleminderit @rtvklan për mikpritjen dhe gjithë vlerësimin ndaj meje dhe punës sime gjatë gjithë këtyre viteve, vërtet faleminderit.”

Por pa dyshim, falënderimi më i ndjerë i dedikohej fëmijëve të saj – frymëzimi më i madh për fjalët që emocionuan mbrëmë qindra mijëra shqiptarë:

“Dhe faleminderit fëmijëve të mi, që ishin burim frymëzimi për monologun që uroj të ketë ardhur tek ju me të njëjtin emocion që më kaploi mua.”

Me largimin zyrtar të Arbanës, Top Channel duket se po konsolidon pozicionin e Ledion Liços si drejtues kryesor i Big Brother VIP Albania. Ledioni ka fituar terren gjatë këtij sezoni dhe duket se do të mbajë rolin e tij edhe në edicionet e ardhshme.

Burime jozyrtare brenda televizionit përflasin se Top Channel do të shfrytëzojë këtë moment për të sjellë një frymë të re në formatin e reality show-t më të ndjekur në vend, duke investuar më shumë në produksion dhe dinamika të reja për sezonin tjetër.

Ndërkohë, spekulimet janë të shumta për të ardhmen profesionale të Arbanës. Disa zëra lënë të kuptohet se ajo mund të përfshihet në projekte të reja jashtë ekranit shqiptar, ndërsa të tjerë e shohin drejt një aventure të re televizive brenda @rtvklan.

Në çdo rast, largimi i saj ka krijuar një vakum emocional tek publiku i Big Brother VIP, ndërsa Top Channel pritet të intensifikojë fushatën e re për të mbajtur audiencën e fortë në prime-time.