I arrestuari për të shtënat në sheshin Bizet në Anderlecht ishte dënuar më parë për vrasje – u lirua pas një të tretës së dënimit

Personi i arrestuar për të shtënat e ndodhura në sheshin Bizet në Anderlecht nuk është i panjohur për drejtësinë belge. Sipas gazetës La Dernière Heure që citon noa.al, ai ishte dënuar në vitin 2017 me 21 vite burg nga Gjykata e Jurisë në Bruksel, për vrasjen e Arturit, një shtetasi shqiptar 35-vjeçar.

I dyshuari ka vepruar për hakmarrje, duke besuar se viktima ishte përfshirë në një përleshje të mëparshme në një kafene. Megjithatë, Arturi ishte shpallur i pafajshëm për këto akuza, trembëdhjetë ditë para tragjedisë.

Ngjarja tragjike kishte ndodhur në vitin 2013, kur viktima u godit për vdekje me thikë në stacionin e metrosë Rogier në Bruksel.

Pavarësisht këtij dënimi të rëndë, i dyshuari u lirua pas përfundimit të vetëm një të tretës së dënimit të tij.

Tashmë, ai është sërish nën hetim, pas një ngjarjeje të ndodhur gjatë natës mes 21 dhe 22 marsit 2025, kur një person u plagos rëndë në bark nga të shtënat në sheshin Bizet në Anderlecht. Viktima ndodhej në gjendje kritike, por fatmirësisht tani jeta e tij nuk është më në rrezik.

I dyshuari u arrestua më 27 mars dhe aktualisht ndodhet nën mbikëqyrje elektronike.

Ai po mohon akuzat e reja para policisë dhe gjykatësit hetues. Aktualisht janë duke u analizuar të dhënat telefonike për të verifikuar deklaratat e tij. Një dhomë këshilli duhet ende të vendosë në javët e ardhshme.

Avokatja e tij, Samira Bouyid, nuk pranoi të komentonte, duke përmendur interesat e klientit të saj. /Noa.al