Ndërron jetë legjenda shkodrane e futbollit, Paulin Ndoja

Futbolli shkodran dhe ai shqiptar është sot më i varfër. Ka ndërruar jetë në moshën 79-vjeçare Paulin Ndoja, një nga figurat më të ndritura të sportit kombëtar dhe pjesë e katërsheve të lavdishme të futbollit të Shkodrës, bashkë me emra të mëdhenj si Medin Zhega, Ramazan Rragami dhe Sabah Bizi.

I njohur si “Mjeshtër i Madh”, Paulin Ndoja lindi në Shkodër më 19 dhjetor 1945 dhe u përfshi që herët në rrugën e sportit, duke u dalluar menjëherë si një talent i rrallë. Në moshën 20-vjeçare, ai fitoi Kupën e Shqipërisë me Vllazninë në vitin 1965. Pas një periudhe në Skrapar për shërbimin ushtarak, u rikthye në ekipin e zemrës për të ndihmuar në fitimin e titullit kampion dhe të Kupës së Shqipërisë në sezonin 1971-1972.

Megjithatë, rruga e tij si lojtar u ndërpre padrejtësisht në vitin 1973 për arsye biografike. Kontributi i tij në futboll nuk u ndal me kaq – gjatë viteve ’80 e në vazhdim ai punoi si trajner portierësh, detyrë që e kreu me përkushtim deri para pesë vitesh.

Ndarja nga jeta e Paulin Ndojës është një humbje e madhe për sportin shqiptar. Ai do të kujtohet gjithmonë si simbol i pasionit, përkushtimit dhe talentit të rrallë që Shkodra i ka dhuruar historisë së futbollit shqiptar.