Një tjetër emër i madh i futbollit shkodran dhe atij shqiptar është shuar. Pas ndarjes nga jeta të ikonave si Medin Zhega, Ramazan Rragami dhe Sabah Bizi, është ndarë nga jeta edhe Paulin Ndoja, i njohur si pjesë e katërshe së famshme që la gjurmë të pashlyeshme në historinë e futbollit tonë.

“Mjeshtri i Madh” ndërroi jetë në moshën 79-vjeçare, duke lënë pas një karrierë të ndritur si futbollist dhe trajner.

I lindur në Shkodër më 19 dhjetor 1945, Ndoja nisi që herët të merrej me futboll, duke spikatur menjëherë për talentin e tij si portier.

Në moshën 20-vjeçare fitoi Kupën e Shqipërisë me Vllazninë në vitin 1965. Pas një periudhe të shkurtër në Skrapar si ushtar, u rikthye në Shkodër, ku ndihmoi ekipin të fitonte titullin kampion dhe Kupën e Shqipërisë në sezonin 1971-1972.

Një vit më vonë, për arsye biografike, iu desh të largohej nga futbolli aktiv. Në vitet ’80, nisi një tjetër kapitull si trajner i portierëve, profesion që e ushtroi me përkushtim deri para pesë vitesh.

Trofetë e fituara:

Si futbollist: Kupa e Shqipërisë (1965), Kampion i Shqipërisë dhe Kupa (1971-72)

Si trajner: Kupa e Shqipërisë (1987), Kampion i Shqipërisë (1992, 1998, 2001)

Reagimi i kreut të FSHF-së

Pas ndarjes nga jeta të legjendës së portës shkodrane, ka reaguar edhe presidenti i FSHF-së, Armando Duka, duke e cilësuar Paulin Ndojën si një ikonë të futbollit shqiptar dhe një figurë me kontribut të pashlyeshëm për Vllazninë dhe sportin kombëtar.

“Mjeshtri i Madh”, një ikonë e vërtetë e sportit, i ka dhënë shumë futbollit si lojtar për shumë vite e më pas si trajner, duke lënë pas një trashëgimi të çmuar për brezat që erdhën pas. Një personalitet i madh, i cili ka dhënë një kontribut të pashlyeshëm për Vllazninë dhe për futbollin tonë.

Në emrin tim dhe të Federatës Shqiptare të Futbollit, i shpreh ngushëllimet më të sinqerta familjes Ndoja, të afërmve, miqve dhe gjithë komunitetit sportiv shkodran për këtë humbje të madhe.

Kujtimi i tij do të mbetet gjithmonë i paharruar. U prehsh në paqe, legjendë!” – shkruan Duka.