Një tjetër histori e trishtë që pasqyron realitetin e hidhur të mijëra të moshuarve në Shqipëri. Sot, më 15 mars 2025, në fshatin Fitore të Novoselës, u zbulua trupi i pajetë i 81-vjeçarit H.T., i cili dyshohet se kishte ndërruar jetë prej disa ditësh, pa asnjë njeri pranë për ta ndihmuar apo për të lajmëruar autoritetet.

Një skenë që fatkeqësisht është bërë e zakonshme: fëmijët e detyruar të emigrojnë për një jetë më të mirë, ndërsa prindërit e tyre lihen pas, të harruar nga një shtet që ka dështuar të krijojë kushte për një pleqëri të dinjitetshme. Institucionet sociale janë të paafta ose të papërfillshme, dhe politika që duhej të ofronte mbështetje është e zënë duke numëruar premtimet boshe.

Ky nuk është një rast i izoluar. Ky është fati i mijëra të moshuarve shqiptarë, të cilët jetojnë dhe vdesin të vetmuar. Për ta kujtohen vetëm kur dikush ndjen erën e rëndë të trupit të dekompozuar dhe lajmëron policinë. Dhe ndërkohë, ata që kanë krijuar këtë realitet, politikanët, vazhdojnë të flasin për “suksese” dhe “zhvillim ekonomik”, ndërsa populli i tyre ikën, dhe ata që mbeten, vdesin në heshtje.