Pak ditë më parë, një sherr me sende të forta ka ndodhur në Gramsh dhe i plagosur rëndë ka mbetur një 44-vjeçar.

JOQ ALBANIA ka mësuar se autor i kësaj ngjarje është Algert Mina, një emër i njohur në Gramsh, pasi në korrik mbeti i plagosur gjatë një shpërthimi me tritol.

Sherri i Minës me 44-vjeçarin ka nisur për motive banale pasi ky i fundit i ka kërkuar të lëvizë pak makinën për të kaluar, pasi kishte bllokuar rrugën.

Por kjo kërkesë, kaq njerëzore, duket se nuk i ka pëlqyer 40-vjeçarit Mina i cili i ka thënë “Kush je ti që më thua lëviz mbrapa” dhe e ka përplasur me makinë 44-vjeçarin.

Pas kësaj 44-vjeçari ka gjetur me shumë vështirësi rrugën për të kaluar, duke u futur në një pronë private, dhe ka ikur në shtëpi, ku ka parkuar makinën poshtë pallatit.

Vajza e tij e mitur i ka kërkuar t’i blejë lëpirëse në dyqan dhe 44-vjeçari ka lënë makinën dhe është drejtuar për në dyqan.

Por në këtë moment, Algert Mina është rikthyer në lagjen e 44-vjeçarit, bashkë me dy shokë të tij, dhe e kanë rrahur barbarisht me shkopa bejsbolli.

E gjithé kjo skenë e frikshme ka patur si dëshmitare vajzën e mitur të 44-vjeçarit e cila e tronditur ka thirrur mamanë për ndihmë: “O mami, o mami, po rrahin babin”.

Të alarmuar banorët e lagjes kanë dalë me shpejtësi jashtë dhe kanë ndërhyrë për të ndarë autorin dhe ndihmësit e tij.

Ata kanë transportuar me urgjencë në spital 44-vjeçarin, ndërsa autorët janë arratisur.

Policia ka arritur të arrestojë shtetasin M. T., 38 vjeç dhe ka shpallur në kërkim shtetasin Algert Mina 40 vjeç dhe shtetasin K. K., 37 vjeç.

Qytetarët e Gramshit janë të tronditur nga kjo ngjarje dhe kërkojnë arrestimin e menjëhershëm të Minës, pasi e konsiderojnë si një person me rrezikshmëri të lartë, bashkë me dy vëllezërit e tij.