Detaje të reja janë zbardhur lidhur me plagosjen e një 18-vjeçare në një hotel pranë rrethrrotullimit të Fakultetit Ekonomik në Tiranë.
Hetimet paraprake tregojnë se 18-vjeçarja, me inicialet N. K., dyshohet se është vetëplagosur me armë zjarri në gjoks. Pas ngjarjes, ajo është transportuar drejt spitalit rreth orës 00:15 nga shtetasja Mirvete Rexhmati (Gjuta), 48 vjeçe, dhe E. Gj., 24 vjeç.
Në vijim të veprimeve hetimore, policia ka vënë në pranga 48-vjeçaren së bashku me Vladimir Gjutën, ndërsa tre persona të tjerë janë shpallur në kërkim. Ndaj tyre rëndojnë veprat penale “Moskallëzim i krimit” dhe “Veprime që pengojnë zbulimin e së vërtetës”.
Ndërkohë, një prej personave të shpallur në kërkim, E. Gj., 22 vjeç, i cili rezulton të jetë edhe i dashuri i të resë, akuzohet gjithashtu për veprën penale “Armëmbajtja pa leje”.
Policia vijon hetimet për zbardhjen e plotë të rrethanave të ngjarjes.
